BAGUIO CITY – Dumanon iti pakabuklan a 1,766 nga utot ti natiliw dagiti vendors ti Merkado Publiko ti siudad ti Baguio kabayatan ti makabulan a Rat Catching Challenge.
Iti panagleppas ti pasalip ket naideklara a nangabak ti Lechon Section a nakatiliw iti 7.9 percent iti nasao a bilang dagiti utot.
Maikadua ti Pines Meat Mart a nakatiliw iti 7.4 percent ken maikatlo ti Entrails Section a nakatiliw iti 7.2 percent.
Makaawat iti P20,000 ti nangabak a section; P10,000 iti maikadua ken P5,000 iti maikatlo a section.
Sigun ken ni Market Superintendent Fernando Ragma Jr., amin dagiti section a nairaman iti Top 10 ket makaawat iti certificates of appreciation.
Kinunana a mairekomendar met laeng iti Baguio City Market Authority (BCMA) ti pannakaipaay ti kuarta kas insentibo kadagiti section ken stallowner a nakatiliw iti kaaduan nga utot.
Innayon ni Ragma a maituloy ti panagtiliw kadagiti utot iti merkado publiko ti siudad uray nalpasen ti Rat Catching Challenge.
