BAGUIO CITY – Pagparparikutan ita ti Philippine Overseas Labor Office sadiay Switzerland dagiti undocumented overseas Filipino Workers (OFWs) a nakaro nga apektado ita gapu iti manarimaan a community quarantine sadiay gapu metlaeng iti COVID-19 pandemic.
Iti interview ti Bombo Radyo Baguio, kinuna ni Atty. Cheryl Daytec-Yagot, Labor Attaché ti Pilipinas para kadagiti pagilian a Switzerland, Poland, Czech Republic ken Liechtenstein State nga agarup iti 2,000 ti undocumented OFWs sadiay Switzerland a kaaduanna ket domestic workers ken dagiti awanan ti kaskenan a papeles.
Kinunana nga agarup met iti 2,000 dagiti documented OFWs ken agarup 6,000 dagiti Pinoy a nagnaeden ken agtatrabaho sadiay.
Innayonna nga adun nga undocumented OFWs sadiay Switzerland ti agdamdamag iti opisinada iti tulong a mabalin nga ited kadagitoy ti gobyerno ti Pilipinas.
Dinakamatna pay nga adda ti 200 a dolyar a nailatang para kadagiti nasao nga OFWs nupay ur-urayenda paylaeng ti pagalagadan no kasano a maiwaras ti tulong pinansial kadagiti agkasapulan nga OFWs sadiay.
Sigun pay kenni Atty. Daytec-Yangot, awan met ti parikut kadagiti Pinoy a permanent residents ken workers ti Switzerland ken dagiti documented OFWs sadiay gaputa uray naawanan dagitoy iti trabaho kabayatan ti community quarantine ket bayadan latta ti employers dagitoy ken ti Swiss government ti sweldo dagitoy.
Kabayatanna, dinakamat ti Labor Attaché nga iti panagmonitor daytoy ket lima a Pinoy sadiay Switzerland ti nakaptan iti COVID-19, pakairamanan ti tallo nga OFWs a nagimbagen.
