Impakaammo ti Department of Education (DepEd) a dumanon iti 25,000 a pagadalan iti pagilian ti delikado ti layus ken panagreggaay ti daga, gapu iti napigsa a tudo nga intuntunda ti Severe Tropical Storm Tino.
Maibasar iti datos ti DepEd-Disaster Risk Reduction and Management Service, delikado iti layus dagiti 9,558 a pagadalan bayat a 15,668 a pagadalan ti delikado met iti panagreggaay.
Gapu iti dayta, balbalakadan ti DepEd dagiti pagadalan ken lokal a gobierno nga agsagana para iti emergency response, ken siguraduen a natalged dagiti alikamen ken suplay.
Kabayatanna, posible nga ag-landfall ti Severe Tropical Storm Tino iti Eastern Samar wenno Dinagat Islands ita nga aldaw, Nobiembre 03 sakbay a dumalapos iti Visayas ken amianan a paset ti Palawan.
