BAGUIO CITY – Agarup 33,000 a baro a botante ti nainayon iti bilang dagiti nakarehistro a botante para iti local ken national election inton sumaruno a tawen.
Daytoy a bilang ket nairaman dagiti transferee a botante manipud ruar iti rehiyon.
Iti panakiuman ti Bombo Radyo kenni Atty. Julius Torres, Regional Director iti Commission on Elections – Cordillera, agtultuloy ti panagregget dagitoy tapno makapagparehistro-da ti adu a bilang dagiti qualified registrants agingga inton Setyembre ita a tawen.
Kabayatanna, kinuna ni Atty. Torres nga agarup 6,000 a registrants ti naikkat iti listaan dagiti botante iti rehiyon.
Dagiti rason ket pimmusayen, nag-abroad, ken nagtransfer iti daduma a municipyo nu sadino dua a daras a saan a nakabotos iti nakarehistroanna a lugar.
Inlawlawagna ni Atty. Torres a saanda a basta-basta nga ikkaten ti nagan dagiti botante a pimmusayen gapu ta agdepdepende da laeng iti rekords ti local Civil Registrar.
Sigun pay kenkuana, maysa a karit a makitkita-da ket awan ti oras dagiti umili, wenno marigatan dagiti umili nga agturong iti sentro tapno laeng agparehistro.
Kinunana met nga ar-aramidenda ti kabaelanda kas iti panangipatungpal iti satellite registration, register anywhere program.
Kabayatanna, kinuna ni Atty. Torres a saandan nga i-authorized ti panakailaylayon pay ti voter registration gapu ta attidogen ti panawen a naipaay iti umili.
Gapu iti dayta, impettengna a nu adda paylaeng ti gundaway ket agturong kadagiti maseknan a lokal nga opisina dagitoy tapno agparehistro.//Bombo Marinel Rodrigo
