Agarup uppat a pulo ket tallo nga indibidual nga anti-illegal mining defender iti munisipyo ti Kasibu, Nueva Vizcaya ti naarestar ken sumangsango ita iti agtutuon a kaso.
Iti eksklusibo a pannakiuman tayo kennni LEIJIN DUGAY, maysa kadagiti anti-mining defender iti nasao a munisipyo, sabali pay manen dagiti dua nga abogado, maysa a prominent anti-mining defender ken maysa a konsehal a nakasuan.
Sigun kenkuana, dagiti immuna a nakemmeg ket dagiti “Kasibu 3” idi August 19; Simmarunu a naarestar ti “Kasibu 11” idi August 28; no sadino sumango metlaeng iti kaso dagiti naarestar a “Kasibu 21” ken “Kakidugen 8”.
Kadawyan a kaso a naipila kontra kadagiti naarestar ket several counts of cyberlibel bayat a dagiti daduma ket nakasuan ti grave- coercion, forcible entry, disobedience ken perjury no sadinno nu bilangen ket agarup tallo pulo a kaso ti naipila kontra kadakuada.
Innayon met daytoy a nakapag-pyansa metten dagiti immunan a naarestar ngem adda pay dagiti baro a kaso a naipila kadakuada idi kalman.
Impeksa ni Dugay a nakasuan dagitoy gapu ti nainget a panangtubngarda iti minas no sadino manamnama nga agrup walo a barangay ti maapektaran kas iti Brgy. Pao pakairamanan ti Sitio Ambedbed ken Degyem , Brgy. Kakiduguen, Brgy Pacquet, Brgy. Dine, Brgy. Catarawan, Brgy. Biyoy, Brgy.Siguem ken Brgy. Muta. Agarup 4,456 met nga ektarya ti daga ti maapektaran iti kanito nga agtuloy ti proyekto ti mining company.
Iti eksklusibo nga interview kenkuana, imbutaktakna metlaeng nga awan ti genuine wenno umno a public consultation nangruna kadagiti directly affected a babbarangay.
Rumrumwar pay a maysa kadagiti nagbalin a modus ti kompanya ket ti panangawis kadagiti sumagmamano a residente panggep ti mushroom training/seminar nga addaan iti attendance sheet nga isu metten ti inaramat ti kompanya a prueba a nangipatungpal dagitoy iti consultation panggep ti panggepda a panagminas.
Malaksid ti dayta, maatap a sumagmamano kadagiti opisyales ti maysa a barangay ti makaaw-awat ti kwarta manipud ti North Luzon Mineral Resources Corporation (NLMRC).
Impetteng met daytoy a saan pulos dagitoy nga umannugot ti panagminas nangruna ta watershed ken agricultural land ti nasao nga area.
Iti agdama, agtultuloy latta ti panagbarikadada tapnu maprotektaranda ti ili da nangruna ta nangrugin ti exploration ti nasao a kompananya no sadino addan ti sumagmamano a naalada a naiparuar. //via Bombo Noveh Organo
