BAGUIO CITY – Pinarut ken inuram dagiti otoridad ti rinibribo a puon ti marijuana nga aggatad ti agarup P4-M manipud kadagiti kabambantayan sadiay Ngibat, Tinglayan, Kalinga idi idi Miyerkoles (August 21) ken Huwebes (August 22).
Sigun iti Kalinga PNP, naisayangkat ti panagparut iti dua a pagmulaan ti marijuana nga addaan kalawa a 1,800 square meters.
Pakabuklan met a 19,800 a puon ti marijuana ti pinarut ken inuram dagiti otoridad nga addaan pakabuklan a gatad a P3,960,000.
Immuna a pinarut ken dinadael dagiti otoridad ti 4,800 a puon ti marijuana iti umuna a target area dagitoy.
Maikadua a pinarut ken dinadaelda ti 15,000 a puon ti marijuana iti maikadua a target area dagitoy.
Nupay kasta, awan ti nakemmeg dagiti otoridad a cultivator kabayatan ti operasyon.
Sigun kenni PCol. Job Russel Balaquit, Acting Provincial Director ti Kalinga PNP, ti agtultuloy nga operasyon dagiti otoridad ket ballaag kadagiti marijuana cultivators para iti panangisardeng dagitoy iti iligal nga aktibidadda.
Umap-apela pay daytoy iti publiko nangruna kadagiti umili sadiay Tinglayan, Kalinga iti panangisardengdan nga agmula ti marijuana tapnu maisardeng metten ti illegal drug trade iti munisipyoda.
