Mangipatakder ti gobyerno iti agarup uppat a ribo a baro nga klasrum tapno masolusyonan ti classroom shortage iti entiro a pagilian sigun kenni President Ferdinand “Bongbong” Marcos, Jr.
Kalpasan daytoy iti panagpinirma ti local government unit (LGU) ken Department of Education (DepEd) iti maysa a Memorandum of Agreement.
Sigun iti pangulo, daytoy ti umuna nga addang tapno mapalawa ti classroom-building program ti administrasyon.
Iti nasao a partnership, mangipaulog ti Department of Education kadagiti pagalagandan, desinyo, ken pondo bayat a ti local government unit (LGU) met ti mangidaulo iti procurement ken aktuwal a konstruksyon kadagiti klasrums tapno mapapartak ti proseso ken maliklikan ti pannakaitantan ti proyekto.
Para ita a tawen, dumanon ti ₱85.39 bilyon ti nailatang para iti Basic Education Facilities. Iti umuna a parte ti programa,nailatang ti ₱9.6 bilyon no sadino ₱4.1 bilyon ditoy ket mapan kadagiti probinsya para iti kontruksyon ti agarup 1,200 klasrum bayat nga 2,800 prefab classrooms met ti gatangen ti Department of Education.
Impasigurado ni President Ferdinand “Bongbong” Marcos a dumalan ti nasao a proyekto iti nainget a validation manipud Department of Education ken awan ti anyaman nga turnover a mapasamak kas paset iti transparency ken accountability.
Kagidan daytoy, adadda met ti pannakapapigsa ti internet connectivity kadagiti pagadalan kas paset iti initiatiba ti gobyerno no sadino ket target da a mangipaay ti agarup sangapulo ket uppat a ribo nga unserved ken underserved school.
Impetteng ni President Ferdinand “Bongbong” Marcos nga agtaltalinaed nga edukasyon ti prayoridad ti administrasyon ken mamati daytoy a nu agtinulong ti lokal a gobyerno ken dagiti ahensiya ket naparpartak ti pannakaisayangkat dagiti proyekto para kadagiti estudyante iti pagilian. // Bombo Karen Calpoe Sapirao
