BAGUIO CITY – naisuko iti pulisya ti agkabsat a nailista a maikapito ken maikawalo a Top Most Wanted Persons iti probinsia ti Kalinga.
Nabigbig dagitoy a da Segundo Lingbawan, 55-anyos ken Christopher Lingbawan, 32-anyos nga agpada a sumangsango iti kaso a murder wenno pammapatay.
Simmuko dagitoy babaen iti dayalogo a naisayangkat iti nagbaetan ti pulis ken ti Barangay Council ti Barangay Upper Lubo, Tanudan, Kalinga.
Mapagat-atapan a ti agkabsat a Lingbawan ti nangpaltog iti managan Limbangan Abuwac Banya-ao idi August 29, 2010 iti mapapati a clan war a nagresulta iti ipupusay ti biktima.
Naipaulog ti warrant of arrest ti agkabsat gapu iti kaso a pammapatay nga awanan ti piansia.
Dinayaw met ni PCol. Davey Vicente Limmong, dadaulo ti Kalinga Police Provincial Office dagiti barangay officials ti Upper Lubo, Tanudan gapu iti tulong dagitoy iti panakaisayangkat ti nakapia a negosasyon para iti panagsuko ti agkabsat.
