BAGUIO CITY – Mabambantayan ken mamonmonitor ita dagiti agtutubo nangruna dagiti lallaki a makinanaig iti pada da a lalaki.
Daytoy ket para iti kampanya ken panangsalaknib kadagiti indibidual kontra iti Human immunodeficiency virus (HIV).
Iti interview ti Bombo Radyo kenni Dr. Celiaflor Brillantes, Acting City Health Officer iti City Health Services Office, agbalbalin a komplikado ti sexual network ti maysa nga indibidual nga addaan ti HIV.
Daytoy ti rason a kasapulan a mapalagipan ken mabagaan dagiti agtutubo nga agbalin a responsable nu makinaig dagitoy.
Innayon pay ni Dr. Brillantes a maysa kadagiti rason ti nasapa a panagaramid dagiti agtutubo iti daytoy ket gapu iti peer pressure ken impluwensiya.
Kinunana a bayat nga ubing paylaeng dagitoy ket nasaysayaat a maisuo kadakuada ti panangliklik iti Sexually Transmitted Disease (STD).
Agyamyaman met ni Dr. Brillantes kadagiti partners-da maipapan iti panagregget dagitoy kontra iti HIV ken ti panakaisayangkat kadagiti HIV testing, distribusyon ti libre a condoms ken dadduma pay.
Iti sabali a bangir, maibasar iti datus ti Department of Health – Cordilleram nakailista ti Baguio City ti 633 a kaso ti HIV, 157 iti Benguet, 138 iti Abra, 43 iti Kalinga, 42 iti Ifugao, 33 iti Apayao, ken 32 iti Mountain Province 32.
