Impetteng ni Senator Francis “Kiko” Pangilinan a saan laeng a racist ken panangtagibasit ti artificial intelligence (AI)-generated video nga inpablaak ti China Daily, maysa nga state-owned media outlet no sadino nailadawan dagiti Pilipino kas bakes nu di ket paset pay daytoy iti propaganda ti Beijing tapno pakapuyen ti bileg ti 2016 Arbitral Award a pumabpabor iti Pilipinas seknan iti isyu idiay West Philippine Sea.
Iti maysa nga interview, impetteng ni Pangilinan a kagidan ti pananglagip iti maika-10 nga anibersaryo ti arbitral ruling ti adadda met a panangisaknap ti China kadagiti saan a pudno nga impormasyon tapno kuwestionaran ti nagbalin a desisyon ti international tribunal.
Sigun kenkuana, agingga ita ket agtultuloy pay laeng ti panangiwaras ti China iti peke nga impormasyon seknan iti isyu ti West Philippine Sea.
Immunan a binabalaw ni Pangilinan ti nasao nga AI-generated video ken kinidawna nga ikaten daytoy ti Beijing, agkidawda iti dispensar, ken sumango ti tao nga ada iti likod ti nasao nga aktibidad.
Maipalagip nga idi Hulyo 16, nangipablaak ti nasao nga media outlet iti video no sadino maimatangan ti maysa a bakes a nakakawes iti Barong Tagalog a nabombaan iti water cannon a patien ti amin a mangireprepresentar iti panangbully ti China kadagiti Pilipino babaen iti water cannon. //bombokaren.c.sapirao
