BAGUIO CITY – Nangnrugin ti implementasyon ti Baguio-La Trinidad-Itogon-Sablan-Tuba-Tublay (BLISTT) Airshed Action Plan 2021.
Daytoy ket babaen iti naisayangkat a kaunaan a roadside inspection and apprehension sadiay Km. 6, La Trinidad, Benguet itay nabiit nga indauluan ti BLISTT Airshed Task Force iti panakibinnadang ti Department of Transportation (DOTr) – Cordillera.
Ti nasao a task force ket bukbuklen dagiti miyembro ti Wastewater, Water and Ambient Air Management Division ti City Environment and Parks Management Office ti Baguio City, dagiti opisyal ti munisipyo ti La Trinidad, Tuba ken Sablan, Environmental Management Bureau – Cordillera ken DOTr-Cordillera.
Nagaramat ti task force iti smoke analyzer tapnu marukod ti karugit ti asok dagiti lugan.
Dumanon met iti 24 a lugan ti naipasidong iti nasao a roadside inspection ken manipud iti nasao a bilang ket 14 dagiti nakapasa iti emission standards.
Naipaayan pay iti Temporary Operator’s Permit dagiti drivers dagiti 10 a bimmagsak iti inspeksion gapu iti panaglabsingda iti Section 46 ti Philippine Clean Air Act.
