Inkari ti lokal a gobyerno ti Munisipyo ti Pudtol, Apayao babaen kenni Mayor Atty. Edmar D. Pascua a mangipaayda iti burial assistance ken dadduma pay a suporta iti pamilya a pinanawan ti nasarakan a bangkay iti nasao a lugar idi kalman.
Maipalagip a nasarakan ti maysa a bangkay idi kalman iti nasoa a lugar, a kinumpirmar dagiti otoridad a ni Revelyn Balatoc.
Immunan a naipadamag a mapukpukaw ni Balatoc idi Setyembre 17.
Apaman a naireport daytoy kadagiti otoridad, naipatungpal ti drone surveillance ken ground search operation para iti nasao a biktima babaen kadagiti rescue teams ken volunteers manipud Barangay Mataguisi, Municipal Disaster Risk Reduction and Management Office kadua ti pulisya, ken Bureau of Fire Protection.
Nakipaset metlaeng iti nasao nga operasyon dagiti sumagmamano a miyembro ti Sanggunang Bayan ti nasao a probinsya ken opisyales ti nasao a munisipyo.
Nasarakan ti bangkay ni Balatoc iti asideg ti Dacao Dam ken dagos a naiturnover iti SOCO–Apayao para iti umno a proseso.
Inyebkas met ti Munisipyo ti Pudtol ti pannakipagriknada iti pamilya ni Balatoc. Kagidan dayta, pinagyamananda amin dagiti nagbalin a paset iti operasyon para iti panakasarak kenni Balatoc.
