Patien ti Save Apayao People’s Organization a mabalin a mapaggidan ti agrikultura ken panagminas lakitdi daytoy ket small scale mining laeng.
Daytoy ket mainaig iti issue iti pampanggepen ti OceanaGold Mining Corporation a panagminas idiay Conner, Apayao no sadino tubtubngaren daytoy dagiti sumagmamano a barangay officials ken organisasyon iti nasao a munisipyo.
Iti pannakiuman ti Bombo Radyo kenni Christina B. Moyaen, mangidadaulo iti Save Apayao People’s Organization (SOPA), kadua ni Ptr. Primo Tacpi, Punong Barangay ti Talifugo, Apayao, impettengna a mabalin a mapaggidan ti pagbiyagan nga agrikultura ken panagminas la kitdi small scale mining laeng.
Innaklon dagitoy nga adda dagiti small scale miners iti nasao a lugar ngem impeksa da a dagiti small scale miners iti nasao a lugar ket agbarbarkis para laeng iti masapolda, saan a kasla iti OceanaGold Mining Corporation a sigun kenni Moyaen ket kayatda nga alaen amin a mineral iti nasao a lugar.
Kabayatanna, impeksa met ni Punong Barangay Tacpi a saan metlaeng a mabalin a mapaggidan ti agrikultura ken iti operasyon dagiti daddakel a mining company.
Sigun kenkuana, addan dagiti nakitada a lugar a naisayangkatan dagiti mining projects nu sadino nakitada a mapunas dagiti bantay.
Impettengna nga iti kanito met a mapasamak daytoy iti nasao a lugar, madadael ti paggapuan ti danum nga aramatenda iti agrikultura. //kcs//
