Nangiruar ti Malacañang iti sumagmamano a proklamasion a mangidekdeklara iti special non-working days iti uppat a munisipyu iti Cordillera ita a Hunio para iti foundation anniversaries dagitoy.
Naideklara ti Hunio 16 kas holiday idiay La Trinidad, Benguet a narambakan idi kalman para iti maika-76 a founding anniversary daytoy.
Idiay Mountain Province, non-working day ti Hunio 18 idiay Barlig para iti maika-60 nga anibersario, bayat a Hunio 25 met idiay Sabangan para iti maika-62.
Naideklara metlaeng ti Hunio 25 kas holiday idiay Calanasan, Apayao para iti maika-63 founding anniversary ken panangrambak iti Lapat Festival.
Sigun iti Malakanyang, panggep kadagiti deklarasion a maipaayan dalan ti aktibo a pannakipaset dagiti umili iti panangrambakda ken pananglagip iti pakaistoryaan kadagiti komunidad da.
