Nainget a pinaglibakan dagiti opisyales a dinakamat ni sigud a Department of Public Works and Highways(DPWH) Undersecretary Roberto Bernardo a nakaawat iti kickback manipod kadagiti proyekto iti gobyerno.
Iti insalaysay ni Bernardo iti Senate Blue Ribbon Committee Hearing idi kalman, nagduduma a porciento ti maatap a naipaay kadagiti nagduduma a nangangato nga opisyales iti gobyerno.
Karaman kadagiti dinakamat ni Bernardo a naaddan iti porsiento da Ako Bicol Party-list Representative Zaldy Co a maatap a nagkiddaw iti 25% commission; ni Maynard Ngu a naipaayan iti 20% a maatap a para kenni sigud a Senate President Chiz Escudero; ni Senator Nancy Binay a maatap a naipaayan iti 15% iti total amount iti partikular a proyekto; ni sigud a Senator Bong Revilla a nakaawat iti 25% ken ti executive office a maatap a naipaayan iti 15% commitment babaen kenni Undersecretary Trygve Olaivar.
Gapu iti dayta, nangipaay dagiti daduma kadagiti naakusaran iti statementda a mangibagbaga a saan a pudno dagiti maiyak-akusar kadakuada.
Iti naipablaak iti social media page ni Senator Chiz Escudero, atapenna nga adda iti “well-orchestrated plan” tapno atakyen dagiti miembro iti Senado ken ibaw-ing ti atensyon manipod kadagiti pudno a nagbasol.
Impeksa met ni sigud a senator ken agdama a Makati Mayor Nancy Binay ti panakakidtot daytoy iti nasao nga akusasyon nu sadino, impettengna a nasayaat ti trabahona ken makita daytoy iti panagserbina.
Kagiddan iti panangibinsa-binsa ni Bernardo kadagiti personal knowledge daytoy seknan iti naanomalyaan a flood control projects, impettengna nga awan iti partisipasyonna iti baet a naam-ammona dagiti daduma pay nga inhinyero a maak-akusaran kas ka da Brice Hernandez, Henry Alcantara, Jaypee Mendoza, ken Arjay Salvador Domasig.
