BAGUIO CITY – Nakasagana ti National Police Commission (NAPOLCOM) – Cordillera a mangimbestigar iti maibagbaga a ‘kapit-system’ iti recruitment ti PNP para kadagiti interesado a sumrek kas Police Officer 1.
Sigun kenni NAPOLCOM-Cordillera Information Officer Soledad Benwaren, karkaritenda dagiti asinoman nga addaan ebidensia iti nasao nga alegasyon nga iparangda dagitoy.
Kinunana a dagusda nga agimbestigar la ketdi adda ti maawatda a pormal a reklamo.
Impettengna a nainget a konkondenaren ti NAPOLCOM-Cordillera ti nepotismo wenno kapit-system gaputa nasken a dagiti agbalin a pulis ket makapasa iti agpada a pisikal ken mental nga eksaminasion.
Agtalek ni Benwaren a saan a pudno ti nasao nga alegasion gaputa agtaltalinaed a nadalus ti rekord ti Cordillera PNP no maipapan iti recruitment kadagiti baro a pulis.
Impannakkelna pay nga iti pakasaritaan ket awan pay ti naaw-awatda a pormal a reklamo seknan iti makunkuna a kapit-system iti PO1 Recruitment ti ahensia.
