Adda karbengan dagiti nagturpos iti Philippine National Police Academy a mangiyebkas iti suportada kenni Vice President Sara Duterte kalpasan a naimpeach daytoy iti House of Representatives, sigun iti Philippine National Police.
Kinuna ti pannakangiwat ti Philippine National Police a ni Police Brig. Gen. Jean Fajardo ti nasao a banag kalpasan nga impeksa ti PNPA Class 1991 ti saan nga agkupas a suportada kenni Duterte, nga inawaganda ti impeachment kontra kenkuana a maysa a kita ti “political persecution” a nairanta a mangdadael ti opisinana ken mangrugit ti reputasionna.
Kinuna ni Fajardo a ti statement ket nangiparangarang iti kapanunotan ti kaaduan a kameng ti PNPA Class 91, malaksid iti tallo nga alumni nga aktibo paylaeng iti pulisya ken kayatda ti agtalinaed nga “apolitical” ken “nonpartisan.”
Impaganetgetna a maikari dagiti alumni ti PNPA a mangiyebkas iti opinionda.
Idi laeng Miyerkules, in-impeach ti House of Representatives ni VP Duterte, a 215 a mammanday-linteg ti nangi-endorso iti maikapat nga impeachment complaint kontra kenkuana, ken nanayunan pay iti 25 a mammanday-linteg, sigun kenni House Secretary General Reginald Velasco.
