BAGUIO CITY – Addan ita iti high risk iti COVID-19 dagiti amin a probinsia ti Cordillera bayat nga adda ti siudad ti Baguio iti critical level.
Kinuna ti Department of Health (DOH) – Cordillera a daytoy ket kalpasan a naobserbaran ti killaat a panagngato dagiti kaso ti COVID-19 kadagiti nagduduma a probinsiya ti rehion.
Nainget a bambantayan ita ti ahensia ti 47 a munisipyo iti Cordillera a makailislista iti nangato a kaso ti COVID-19 kas maibasar iti kaudian a datus.
Gapu iti daytoy, maminsan manen nga inrekomendar ti ahensia ti saan a panagbaybay-an dagiti amin a lokal a gobyerno iti panakaimplementar ken panakatungpal dagiti minimum public health standards ken kadagiti maipatpatungpal a restrictions.
Inyunay-unayda metlaeng ti rekomendasyonda a panagpabakuna dagiti amin nga umili ti rehiyon kontra iti COVID-19 tapno naan-anay a masalwadan ti publiko kontra iti nasao a sakit.
Kabayatanna, amken metlaeng ti DOH-CAR a posible nga addan ti Omicron variant ti COVID-19 ditoy rehiyon nangruna ta maob-obserbaran dagiti indikasyon ti nasao a variant.
Nupay kasta, agtaltalianed nga awan paylaeng ti nailista ti Cordillera a kaso iti Omicron variant ti COVID-19.
Iti agdama, nasurok 90,700 nga umili ti Cordillera ti naimbagan manipud iti COVID-19 bayat a 2,300 dagiti pimmusay ken nasurok 992,400 nga eligible population ti rehion ti naan-anayen a nabakunaan kontra iti nasao a sakit.
