Impakaammo iti Bureau of Immigration (BI) nga awan pay ti rekord a nagturong iti ballasiw-taaw ni Charlie “Atong” Ang iti agdama.
Daytoy ket kagiddan ti panangsarak dagiti otoridad kenkuana gapu iti pakainaiganna iti kaso dagiti missing sabungero.
Sigun kenni Bureau of Immigration(BI) spokesperson Dana Sandoval, awan pay ti kaudian nga outbound record ti nasao a negosyante.
Immunan a dinakamat ni Department of the Interior and Local Government(DILG) Secretary Jonvic Remulla a nakaawat daytoy iti impormasyon nga adda itan ni Ang idiay Cambodia babaen iti panaglibasna iti backdoor.
Gapu iti dayta,kinuna ni Remulla nga adda metten ti grupo iti pulis a naideploy idiay Cambodia tapno saraken ti nasao a pugante.
Immunan nga indeklara ti DILG a maibilangen kas most wanted a personalidad ni Ang iti pagilian nu sadino, naidiaya pay ti ₱10 million a gungguna para kadagiti makaipaay iti impormasyon para iti panakasarak ken panakaarestar ni Ang.
Maipalagip a ti nasao a business tycoon ti maitudtudo a mastermind iti panakapukaw dagiti mammallot nu sadino, maatap a napapatay dagitoy ken naibelleng ti bagida iti paset ti Taal Lake.
