BAGUIO CITY – Nainget ita nga imonmonitor ti Itogon Municipal Police Station dagiti amin a babbarangay ti Itogon kagiddan ti pannakaipatungpal ti “Oplan Double Barrel, Reloaded” iti baet nga immunan a naideklara ti munisipyo kas ‘drug-free municipality’ kalpasan ti clearing operations ti pulisya.
Sigun kenni PSI Jeffrey Vicente, hepe ti Itogon PNP, sipud nangrugi manen ti nasao a kampanya ti pulisya ket awan pay dagiti drug personalities a nakemmeng wenno simmuko kadakuada.
Innayonna nga agtultuloy met latta ti pannakikoordinarda kadagiti religious leaders ken barangay officials para iti interventions ken moral enhancement kadagiti drug surrenderee sadiay Itogon.
Maipalagip nga iti sidong ti umuna nga Oplan Tokhang ti pulisya ket dumanon iti 300 dagiti drug personalities a simmuko sadiay Itogon ngem 82 laeng kadagitoy ti naipasidong iti drug rehabilitation.
