Inispal ti Cambodian National Police ti baente a babbai a Pilipino sadiay Cambodia, kalpasan a naipatulod dagitoy sadiay tapno agbalin a surrogate Mother sigun iti Philippine Embassy sadiay.
Sigun iti nasao a nga embahada, naispal dagiti babbai idi Sitiembre baente tres iti agdama a tawen iti Kandal Province sadiay Cambodia.
Maibasar iti imbestigasion dagiti otoridad, na-recruit dagiti babbai iti online ken agbiaheda kadagiti Southeast Asian country sakbayda a naiturong sadiay Cambodia a maiparit ti surrogacy.
Kabayatanna, maibasar iti panagsukimat dagiti maseknan nga otoridad, sangapulo ket tallo kadagiti babbai ti masikog ken addan iti local hospital bayat a pito kadagitoy ti maur-uray ti pannakaisublida iti pagilian a Pilipinas.
Maipalagip a ti surrogate mother ket maysa a babai nga agsikog ken agpasngay iti anak dagiti sabali a tao wenno agassawa, babaen ti artipisial nga inseminasion wenno in vitro fertilization.
