Kinumpirmar ni Mike Cabangon, Convenor iti Baguio-Benguet Movement Against Jeepney Phaseout a saan a makipaset dagitoy ken dagiti daduma pay a transport groups iti Baguio-Benguet iti maisayangkat a transport strike a naituding a mangrugi inton Mierkules, Agosto 14.
Iti panakiuman ti Bombo Radyo kenni Cabangon, saan a nakasagana ti Baguio-Benguet para iti nasao a transport strike gapu ta inasikaso dagitoy ti panangipila ken panagpapirma ti position paper para iti panakaipatungpal ti public consultation iti The Local Public Transport Route Plan (LPTRP).
Nupay kasta, impetteng ni Cabangon a sisusuporta ladta dagitoy iti tarigagay ti PISTON a maibasura ti Public Utility Vehicle Modernization Program (PUVMP) ken maisubli ti individual franchise dagiti jeepney operators ken drivers nu sadino naituding daytoy ti bulan ti Agosto ken Setyembre.
Kagiddan dayta, impasigurado ti opisyal a nu saan a makaipatungpal dagitoy ti transport strike ket manamnama ti panagprotesta dagitoy.
Kabayatanna, dinakamat ni Cabangon a saan pay a nangrugi ti panakatiliw dagiti agpaspasada a saan pay a nakapagpaconsolidate kas maitunos metlaeng iti pagalagadan nga impaiyulog ti Land Transportation Franchising and Regulatory Board seknan iti daytoy.
Malaksid iti dayta, mapasamak ti krisis iti transportasyon kaspangarigan saan a makapagbiahe ti jeep.//Bombo Rob Dominguez
