Agtaltalinaed iti Blue Alert Status ti Baguio City bayat a mapaspasaran ti epekto ti Tropical Storm a ni Enteng.
Iti panakiuman ti Bombo Radyo kenni Engineer Charles Carame,Local Disaster Risk Reduction and Management Officer,nalpasen a nagtaripnong dagiti maseknan nga opisina iti siudad para iti panagsagana dagitoy iti nadakamat a weather disturbance.
Sigun kenni Engr. Carame, nakaposisyonen dagiti nagduduma a subcommittee, pakairamanan dagiti babbarangay kaspangarigan adda ti mapasamak a saan a nasayaat kadagiti masakupan dagitoy.
Innayon ni Carame nga awan pay ti immawag manipod kadagiti nagduduma a babbarangay seknan iti kinakurang dagiti alikamen a kasapulanda para iti panagresponde.
Nupay kasta, inyunay-unay ni Carame ti dagos a panangipakaammo dagitoy kadagiti pakaseknan iti masakupanda a babbarangay.
Mainaig iti dayta, saan pay a karaman ti siudad ti Baguio kadagiti kritikal a mabanbantayan nu maipapan iti panagreggay iti daga.
Iti baet dayta,mabanbantayan latta met ti Dominican Barangay, Atok Trail, ken iti paset ti Dontogan iti posible a panagreggaay iti daga kas maibasar iti naaramid a climate and disaster risk assessment.
Malaksid iti dayta, mabanbantayan met dagiti daduma pay a barangay pakairamanan iti City Camp, San Luis ken iti San Carlos, Irisan Barangay seknan iti panaglayos.//Bombo Rob Dominguez
