BAGUIO CITY – Nadutukan ni Baguio City Mayor Benjamin Magalong kas ambasador ti Disiplina Muna, maysa nga advocacy campaign ti Department of the Interior and Local Government (DILG-Cordillera)kagiddan iti panakaiyuswat daytoy iti Baguio Country Club itay agsapa.
Sagudayen ti nasao a kampanya ti panakaital-o ti good governance kadagiti lokal a gobierno ken ti panakaimula iti disiplina kadagiti amin nga umili ti Cordillera.
Ti nasao a kampanya ket bukbuklen iti pito a kampanya a pakaipatungpalan ti Road Clearing, Disaster Preparedness and Resilience, Anti Smoking, Ease of doing Business, Liquor Ban, Environmental wenno Tourist Clean up ken Anti-Drug Abuse Campaign.
Sigun kenni DILG Regional Director Marlo Iringan, napili kas ambassador ti nasao nga opisyal gapu kadagiti impakitana a disiplina ken good governance kabayatan ti panagtugawna kas mayor iti siyudad ti Baguio.
Gapu iti daytoy, impeksa ni Magalong ti panagyamanna iti nasao nga ahensya gapu iti titulo ken gundaway a naipaay kenkuana kas ambasador iti Disiplina Muna.
