Pina-inget iti city government iti Baguio iti panagserbi iti nasustansya a taraon kadagiti events ken meeting no sadino nagbalinen daytoy a mandatory manipud Septiembre 19 iti agdama a tawen.
Iti naipaulong nga ordinansa iti healthier food environment iti siudad, imbinglay ni City Health Officer Dr. Celia Flor Brillantes nga awan ti public funds ti mausar kadagiti saan a nasustansya a taraon iti siudad.
Iti sidong ti healthy food policy, dagiti maiserbi a taraon kadagiti pasken iti siudad ket kasapulan a nababa ti asukar, asin ken taba ken kasapulan a nangato ti fiber na. Maiparparegta pay kadagiti opisial ti panaggatang dagiti ingredients ket kasapulan a basaenda dagiti food labels kas praktical guide no agpilida iti taraon.
Ti ordinsa a naipasa idi Marso ket nairanta a mangkomplementar kadagiti dadduma pay a wagas ti siudad a mang-address iti umad-adu a noncommunicable diseases, pakairamanan ti hypertension, diabetes, chronic kidney disease, cancer ken obesity kadagiti agtutubo, nataengan ken senior citizens.
Kinuna ni Brillantes a ti 2025 morbidity report ti siudad ket nangipakita iti hypertension, upper respiratory infection ken diabetes kadagiti kangrunaan a sakit a nairekord, no sadino nairekord ti 12,775 a kaso iti hypertesion.
Innayonna pay a paset ti healthy food ordinance ti nalawlawa a panagregget a mang-address kadagiti sakit a mainaig iti lifestyle-related diseases.
Kabayatanna, indagadag met Baguio City Mayor Benjamin Magalong kadagiti national government agencies ken dagiti private-sector organizations nga agaptar dagiti similar measures ken makipagtrabaho iti panangitandudo iti salun-at dagiti mangmangged ken kliyente iti siudad.//Bombo Khey Reparip
