Awan ti “major damage” nga intunda ti panagdalapos ti bagyo a ni “Julian” iti munsipyo iti La Trinidad.
Iti panakiuaman iti Bombo Radyo kenni Yoshi Labi, opisyal iti Municipal Disaster Risk Reduction and Management Office iti La Trinidad, pinagyamananna dagiti sangapulo ket innem (16) a Barangay Disaster Risk Reduction and Management Council iti nadakamat a munsipyo iti panagserbida kas frontline a nang-asikaso kadagiti babassit a kaso iti panagreggaay iti daga ken daduma pay a kasapulan a maaramid kadagiti masakupanda a babbarangay.
Sigun kenni Labi, awan pay ti impaay dagiti kameng iti agriculture sector kadakuada a report seknan iti nagbalin a danyos ti nadakamat a bagyo kadagiti pagmulaan iti strawberry.
Nupay kasta,kinuna ti opisyal a saan a napasaran ti nakaro unay a panaglayos gapu iti panagsarde-sardeng ti tudo.
Iti sabali a bangir, kinuna ni Labi a dakkel a katulungan para kadakuada iti landslide monitor nga agtaltalinaed a nakamuntar iti paset ti bantay idiay Little Kibungan, Puguis La Trinidad, Benguet tapno masakbayan ti panagpabakwit kadagiti residente sadiay kaspangarigan agtaud ti pangta iti panagreggaay iti daga.
Iti agdama,agtaltalinaed daytoy iti Level 1 rason a masapol ti panagsagana dagiti residente iti posible a panagbakwit.
Maipalpalagip met ti agnanayon a panangisagana dagitoy kadagiti Go Bags-da para kadagiti posible a didigra a mapasaran.//Bombo Rob Dominguez
