BAGUIO CITY – Nabirukanen ti bangkay ti asawa a babai a nagaburan iti Antamok River sadiay Loacan, Itogon, Benguet iti maikapat nga aldaw ti search, rescue and retrieval operations.
Maibasar iti report, nabirukan ti bangkay ni Morina Lintan iti alas-8:05 ti agsapa iti asideg ti immunan a nangkitaan ti search team iti bangkay ti asawana.
Maipalagip nga idi malem kalman ket immuna a nabirukan ti bangkay ti asawa a lalaki a ni Nestor Talangkag Sr.
Maipalagip pay a nagaburan ti agasawa bayat ti kaaddada iti karayan sadiay Beda, Loacan, Itogon, Benguet idi agsapa ti Martes, Agosto 17.
Sigun met kenni Loacan Punong Barangay Andres Cuyan, maimassayag ken maitabon ti bangkay ni Lintan sadiay Tublay, Benguet bayat a ti bangkay ni Talangkag Sr. ket sadiay Itogon, Benguet.
Nangisayangkat metlaeng dagiti otoridad iti ‘dao-es’, maysa a cleansing ritual dagiti Cordillerans tapnu saanen a maulit ti kapada nga insidente.
Naipaayan metten iti kaskenan a tulong dagiti pamilya ti agasawa.
