BAGUIO CITY – Nasarakanen ti bangkay ti maysa a lalaki a mapapati a nalmes iti maysa nga irigasyon sadiay Magagasuso, Bulo, Tabuk City, Kalinga itay kanikadua.
Immunan a nabigbig ti lalaki a ni Mervin Baguio, 43-anyos, naasawaan, tubo ti Nueva Ecija ken residente ti Bulo, Tabuk City, Kalinga.
Nasarakan daytoy kalpasan a nangisayangkat dagiti otoridad iti maysa nga aldaw a search and retrieval operation iti napasamakan ti insidente.
Iti panakiyuman ti Bombo Radyo kenni Pol. Lt. Rufino Manganip ti Kalinga Mobile Force Company, kinunana a nakaawatda iti report mainaig iti panakalmes ti biktima iti agarop alas kwatro ti malem idi kanikadua.
Naduktalan iti imbestigasyon a sinukon ti asawa ti biktima manipod iti naginuman daytoy no sadino naaddaanda iti nabara nga argumento iti panagawidda a nangitunda tapnu tumpuak ti lalaki iti nasao nga irigasyon.
Nasarakan ti bangkayna idi alas nuebe ti agsapa idi kalman. (-with Bombo Brigitte Marcasi)
