BAGUIO CITY – Maiyawid sadiay Mountain Province ti bangkay ti maysa a minero a pimmusay kalpasan a natnag ken nalmes iti maysa a waig sadiay Paltekan Emerald, Kias, Baguio City idi kanikadua.
Nabigbig daytoy a ni Sammy Dauan, 18-anyos, baro, tubo ti Besao, Mountain Province ken residente ti Purok 5, Kias, Baguio City.
Maibasar iti report ti pulisya, nagpakada ti baro iti amana a sumrek iti trabaho.
Nupay kasta, nakita ti dua a katrabahuanna ti baro a malmalmes iti waig.
Iti met inisyal nga imbestigasyon ti pulisya, posible a aikaglis ti baro a rason iti panakatnag daytoy iti waig.
Iti panagresponde dagiti pulis ket nadanunda ti bagi ti baro a nabalkot ti lupot.
Nagkedked met ti pamilya ti baro a maipasidong ti bangkayna iti otopsiya.
Kinuna ti pulisya nga imbestigaranda ti nasao nga insidente nangruna ta maiparit paylaeng nga umuneg dagiti minero iti usok dagitoy ita a panagtutudo.
Iti agdama, maipimpinalen dagiti dokumento para iti panakaiyawid ti bangkay ni Dauan sadiay Besao, Mountain Province
