Nairuaren dagiti rescuers ti bangkay dagiti tallo a minero a na-trap iti uneg ti tunnel idiay Balcony, Runruno, Quezon, Nueva Vizcaya idi rabii ken itay parbangon.
Immunan a nabigbig dagitoy a da Daniel Segundo, 47-anyos; Florencio Indopia, 63-anyos ken Lapihon Ayudan, 56-anyos, bin-ig a residente ti Runruno.
Immuna a nairuar ti bangkay ni Segundo idi alas onse ti rabii bayat a nairuar met ti bagi ni Indopia ken Lapihon idi alas dose ti rabii ken itay parbangon.
Sakbay iti daytoy, naipadamag idi kalman, Hunyo 25 ti ipupusay ti maysa kadagiti volunteer rescuers a ni John Philip Guinihid kalpasan a naibusan iti oxygen iti uneg ti tunnel.
Ni John Philip Guinihid kadwana Johnny Ayudan ket sinumrek iti tunnel idi rabii ti Hunyo 24 tapno iruar ti bagi ti kabsatna a ni Lipihon Ayudan, maysa kadagiti lima a minero a na-trap idi Hunyo 23 kalpasan a naibusan dagitoy iti oxygen.
Manipud kadagiti lima a minero a na-trap, da Alfred Dulnuan ken Joval Bantiyan laeng ti naispal idi Hunyo 24.
