BENGUET PROVINCE – Ipampannakkel ita ti municipyo ti La Trinidad iti pannakabigbig ti Barangay Shilan kas 2nd Best Tourism Village iti 2024 Search for the Best Tourism Villages in the Cordilleras ti Department of Tourism – Cordillera ita a tawen.
Iti interview ti Bombo Radyo kenni Dario Montes, Founder ti Shilan Tour Guide Association, ti in-showcase-da iti turismo iti Shilan ket ti panakikaykaysa ti komunidad tapno mapapintas ken maitandudo ti turismo iti nasao a lugar.
Kinunana nga amin dagiti barangay officials, associations ken dagiti barangays ket nagtitinnulong, rason nu apay nagun-odda ti pammaddayaw.
Malaksid iti dayta, haan met nga agsardeng dagiti innovations nga ar-aramidenda.
Dakkel met ti panagyamanda iti local government unit ti La Trinidad gapu iti tulong ken suportada tapno magun-odda ti pammaddayaw.
Karaman kadagiti ipampannakel ti Shilan Community Tourism ket dagiti agro-tourism farms, mini parks, flower gardens, ken dadduma pay.
Agtultuloy met ti panangmintenar kadagiti farms ken gardens babaen iti panagimula ken panagpapintasda kadagiti mulmula tapno mapagtalinaed ti kinapintas ti natural tourism sites iti nasao a barangay.
Maipalagip a ti 2024 Search for the Best Tourism Villages in the Cordilleras ket addaan ti criteria a 25% iti sustainable management; 25% iti cultural sustainability; 25% iti socio-economic and rural economic development sustainability; ken 25% iti environmental sustainability.
Ti first placer ket ti Sustainable Tourism Village ti Damag, Jacmal ken Bunhian idiay Aguinaldo, Ifugao, a nakaawat ti P1 million pesos; 2nd place ti Shilan Community Tourism Village iti La Trinidad, Benguet a nakaawat ti P500,000; ken 3rd place ti Tawang Tourism Village idiay Balbalan, Kalinga, a nakaawat ti P200,000.00.
Dagiti naawatda a cash price ket maaramat kas panang-implementar dagiti proyekto a mangital-o iti sustainable ken responsible community-based tourism kadagiti tourism villages dagitoy.
