BAGUIO CITY–Nasarakanen ti bangkay ti maysa a baro itay agsapa kalpasan nga naiyanod gapu iti napigsa nga turong ti danom ti karayan sadiay Kibungan, Benguet.
Nabigbig ti biktima a ni Kyle Tycole Lucaben Budas, 21-anyos, baro, estudyante ken residente ti Sipitan, Bakun, Benguet ken sigud a nangibagi iti Bakun iti Search for Mr. and Ms. Benguet 2019.
Maibasar iti report ti Kibungan Municipal Police Staion, nagturong ti biktima ken dagiti kabagyanna sadiay Abas, Poblacion, Kibungan, Benguet partikular iti nasao nga karayan tapnu aglaba ken agdigus iti alas-10:30 ti agsapa idi kalman, Agosto 23.
Nupay kasta, aksidente a naikaglis ni Budas iti timakderanna a bato ken ditoy a natnag agingga a naiyanod gapu iti napigsa nga turong ti danom ti karayan.
Dagus metlang nga rimmisponde ti kabagyan daytoy ngem saanen a naispal ti biktima.
Naisayangkat ti joint and search rescue operation agingga a masarakan ti bangkay daytoy iti banda nga alas 8:30 itay agsapa sakbay naiyawid ti bangkayna iti pagtaengan dagitoy.
Binigbig met ti lokal a gobierno ti Bakun, Benguet ti kontribusyon ni Budas iti lokalidad sadiay.
