BAGUIO CITY – Impaulog ni La Trinidad Mayor Romeo Salda ti Executive Order No. 14, series of 2020 a nakailanadan dagiti pagalagadan iti temporaryo a partial closure ti La Trinidad Vegetable Trading Post ken ti temporaryo a panakairikep dagiti pribado a trading centers a masarakan iti munisipyo.
Sagudayen ti pammilin ti panakaipatungpal dagiti nainget a pagalagadan a masurot iti operasyon ti La Trinidad Vegetable Trading Post tapnu maliklikan ti panagwaras ti COVID-19.
Karaman ditoy ti panakaisardeng ti retailing activity mangrugi inton March 27, aldaw ti Biyernes.
Maikalkalikagum ita ti panag-obserbar iti spacing iti panagparada dagiti lugan a katukad ti dua na metro a distansia bayat a maipawil ti double parking.
Nailanad metlaeng a maksayan ken agbalin a kagudua ti bilang dagiti truckers a mangibibiahe iti natnateng kadagiti nagduduma nga LGUs ken dagiti truckers kadagiti pribado a trading ken parking areas ket mabalin nga akomodaren ti Benguet Agri-Pinoy Trading Center (BAPTC)
Naituding a maakomodar iti La Trinidad Vegetable Trading Post tunggal Lunes, Miyerkoles ken Biyernes dagiti vegetable truckers nga addaan biahe a Divisoria, Pasig, Balintawak, Commonwealth, Novaliches, Tacloban, Iloilo ken amin a tawid-dagat.
Maakomodar met tunggal Martes, Huwebes ken Sabado dagiti vegetable truckers nga addaan biahe a Bicol, Pampanga, Nueva Ecija, Nueva Vizcaya, Ilocos Sur, Ilocos Norte, Zambales, Cavite, Bataan ken dadduma pay a probinsia.
Agserbi met a rest day wenno panaginana ken cleaning day wenno panagdalus ti aldaw ti Dominggo.
Naibilin pay ti ‘no touch down’ policy kadagiti drivers ken helpers bayat a dagiti truckers ken traders ket nasken nga agtalinaedda laeng iti uneg ti luganda.
Limitado met iti maysa a handler ken dua a helper wenno personnel ti kada cubicle bayat a malimitaran met iti dua a helpers dagiti disposes malaksid no adu unay ti nateng nga agkasapulan ti agingga uppat a helpers.
Mapawilan a makastrek iti La Trinidad Vegetable Trading Post dagiti agilaklako ti papel ken cellophane bags malaksid laeng kadagiti agilaklako ti dadakkel a plastik a mapatgan nga agitugot iti maysa nga assistant.
Agsardeng inton April 27 ti operasyon dagiti private trading areas malaksid kadagiti agilaklako ti broccoli, cauliflower ken carrots.
Responsibilidad met dagiti handlers ti IDs dagiti helpers dagitoy ken amin a sumrek iti nasao a trading center ket nasken nga agisuot iti face masks ken gloves ken agtungpal iti physical distancing a maitunos iti no face mask and no gloves, no entry policy.
Maipasidong pay iti disinfection dagiti amin a lugan a sumrek iti La Trinidad Vegetable Trading Post.
Maipalubos laeng ti panaglukat dagiti odd-numbered booth ken cubicles iti Bagsakan Area, iti cold chain ken iti Ping-ay Area, pakairamanan dagiti cubicles iti kanawan a paset ti La Trinidad Vegetable Trading Post iti Lunes, Miyerkoles ken Biyernes bayat a ti panaglukat dagiti even-numbered booth ken cubicles iti Bagsakan Area, iti cold chain ken iti Ping-ay Area, pakairamanan dagiti cubicles iti kanigid a paset ti La Trinidad Vegetable Trading Post iti Martes, Huwebes ken Sabado.
