Impetteng ni Manila 3rd District Representative Joel Chua nga awan iti sidong ti linteg ti baro a polisiya ti Philippine National Police a maiparit ti tattoo kadagiti kameng ti nasao nga ahensia.
Sigun kenni Chua, awan ti nakasaad a kualipikasion ken diskualipikasion iti Section 30 ti Republic Act 6975, ken saan a maiparit ti panagtattoo wenno aniaman a kapadana iti sidong ti Code of Conduct and Ethical Standards for Public Officials and Employees wenno Rebulic Act 6713.
Innayon ti nasao nga opisyal a ti laeng posible ken rason a maiparit ti tattoo kadagiti opisial ti polisia ket ti pannakairaman iti aniaman a kriminal nga organisasion.
Kasaruno daytoy iti inwaragawag ti Philippine National Police a maiparit a makita ti tattoo dagiti polis no nakaunipormeda ken maiparit a nayonanda daytoy.
