Inyuswat ni President Ferdinand Marcos, Jr. ti maysa a baro a digital platform para iti nalaklaka nga access kadagiti gatad a gasgastosen ti gobyero.
Ti baro a sistema ket naawagan kas Centralized Open Monitoring Platform for Appropriations and Spending Statistics wenno DBM Compass a bukbuklen ti Department of Budget and Management.
Kagiddan dayta, indauloan ni President Ferdinand Marcos ti panangparegta iti updated Philippine Public Financial Management Reform Roadmap 2024-2028 tapno mapapigsa ti finances ti pagilian.
Sigun kenni President Marcos, Jr. a ti kuwarta ti pagilian ket para metlaeng iti pagilian ken karbengan amin ti Pilipino a makita ken mabuya no ayna ti pagturturongan dagiti baybayadanda a buwis.
Babaen iti DBM COMPASS, maadaan ti publiko iti maysa nga online portal a naglaon kadagiti interactive charts tapno mapapartak ti panangsarak dagitoy kadagiti kasapulanda nga impormasyon kas iti budget, obligasyon dagiti opisina, ken aktuwal a gatad nga ipaparuar dagiti nagduduma nga ahensya.
Innayon pay ti presidente a ti naurnos a panang-handle kadagiti pondo ket adda direkta nga epektona iti napartak a panangpatakder kadagiti pagadalan, pagagasan, ken panangipaay iti tulong kadagiti mannalon ken mangngalap, pakairamanan ti panangipatungpal kadagiti proyekto kadagiti adayo a lugar.
Kagiddan dayta, binilin ni President Ferdinand Marcos, Jr. amin nga ahensya ti gobyerno a simpaenda dagiti budget dagitoy ken tarimaanenda metlaeng dagiti reports ken proyektoda.
Impettengna pay a tapno mapagtalinaed ti talek dagiti Pilipino, saan a rumbeng nga agpatingga laeng dagiti proyekto kadagiti papel ken dokumento ngem karbengan dagiti Pilipino a marikna ken makita dagitoy.//bombokaren.c.sapirao
