BAGUIO CITY – Mangrugin inton sumaruno a lawas ti baro nga schedule iti panagawat ti COMELEC-Baguio kadagiti kliyente daytoy, nangruna dagiti agparehistro para iti masungad nga eleksion.
Iti interview ti Bombo Radyo Baguio, kinuna ni City Election Officer Atty. John Paul Martin nga aglukat ti opisinada iti Martes agingga Sabado iti alas otso ti agsapa agingga alas singko ti malem bayat a Lunes ti disinfection day.
Inlawlawagna a ti panagbaliw iti schedule ti panaglukatda ket tapnu ad-adu a qualified voters ti agturong ti opisinada, nangruna iti weekends para kadagiti addaan ti trabaho iti weekdays.
Namnamaenna nga iti at-atiddog nga aldaw a panagparehistroda iti makalawas ket manayonan pay ti bilang dagiti agparehistro kadakuada.
Imbinglayna met a kiniddawda ti tulong ti Sangguniang Kabataan iti siudad para iti nalaklaka a panagparehistro dagiti kabarangayan dagitoy.
Maibasar iti datus ti COMELEC-Baguio iti bulan ti Pebrero ket nasuroken a 1,300 dagiti nagparehistro a botante iti opisina dagitoy.
