BAGUIO CITY – Epektibon idi kalman, March 30 ket saanen a mabalin a sumrek iti Baguio City Public Market dagiti pribado a lugan ken maiyakar ti pagparadaan dagiti parapubliko a jeep nga agparparada iti Lower Kayang Street.
Iti interview ti Bombo Radyo Baguio kenni PMaj. Marlo Evasco, dadaulo ti Baguio City Police Office – Station 7, kinunana a gapu iti kaadu dagiti tattao nga inaldaw nga agturturong iti merkado publiko ket nagaramidda iti baro a pagalagadan.
Sigun kenkuana, naibilin ti panangikabil dagiti vendors ken establishimento iti marka a suruten dagiti kustomer dagitoy para iti panaka-obserbar ti social distancing.
Dinakamatna a ti laeng maipalubos a lugan a sumrek iti public market ket dagiti lugan nga agitulod ti produkto ken tunggal quarantine checkpoint kadagiti entry ken exit points ti merkado ket bantayan ti sag-lima a personnel ti pulisya.
Inlawlawagna a mabalin nga agparada dagiti pribado a lugan iti Lake Drive, Harisson Road, Otek Street, Magsaysay Avenue ken iti Jadewell parking area bayat nga agbalin a ‘drop and go point’ dagiti pribado a lugan ti deppaar ti Abanao Street ken ti Upper Magsaysay, partikular iti sango ti Rice Section agingga iti Sari-Sari Section.
Innayon ni PMaj. Evasco a dagiti parapubliko a jeep nga agparparada iti Lower Kayang ket sumrekdan iti Shagem Street ken agparadada ita iti Upper Kayang, pakairamanan ti sigud a paradaan dagiti lugan dagiti pulis.
