Agyamyaman ni Police Colonel Ruel Tagel, City Director ti Baguio City Police Office gapu iti natalna a pannakalagip iti Undas 2024.
Iti panakiuman ti Bombo Radyo kenni Tagel, imbinglayna nga awan ti nailistada nga untoward incident bayat iti All Saints’ Day ken All Souls’ Day iti baet a rinibribo nga indibidwal ti simmarungkar kadagiti walo a sementeryo iti Baguio City.
Maibasar iti datos ti nadakamat nga opisina, dumanon iti agarop duapulo ket maysa a ribo nga indibidwal ti nagturong kadagiti kampo santo idi November 1 bayat a dumanon met iti pito a ribo ti bilang dagitoy idi November 2.
Mainaig iti dayta, kinuna ti dadulo ti kapulisan iti Baguio City a naballigi ti panakaiyimplimintar ti Standard Operating Procedures bayat ti nadakamat nga holiday babaen metlaeng iti panakitinnulong ti lokal a gobyerno iti siudad ken dagiti boluntaryo.
Malaksid iti dayta, innayon ni Tagel a naballigi metlaeng ti panakaiyimplimintar iti traffic plans iti undas a nakaitunda iti panakaawat dagitoy iti pammadayaw wenno panakaapresiar manipod kadagiti sumagmamano a simmarungkar iti Baguio City bayat ti long weekend.
Iti sabali a bangir, adda latta met dagiti nakumpiskar a banned items nu sumrek kadagiti sementeryo nangruna iti Baguio Public Cemetery.
Naobserbaran a kaadwan kadagitoy ket cleaning tools, sigarilyo, vape, arak, ken dadduma pay.
Mainaig iti dayta, inekspektarda metlaeng ti posibilidad nga adda dagiti manggundaway nga agitaray kadagiti naidaton nga atang kadagiti tanem ngem impasigurado ti opisyal a nakaipaay dagitoy iti direktiba kadagiti police personnel nga agrikus ken agmonitor seknan iti daytoy.
Iti agdama, maysa a pagsagsaganaan dagiti kameng iti Baguio City Police Office ti umadanin a pannakarambak ti Christmas Season nu sadino, namnamaenda ti panagngato iti bilang dagiti turista nga agturong iti Baguio City.//Bombo Jez Lapizar
