La Trinidad, Benguet-Naituding a mangidonar ti dua a dialysis machines ken maysa a dental chair ni Benguet Cong. Eric Go Yap iti Benguet General Hospital kagiddan iti mapadpadaan a maika limapulo ket tallo a founding anniversary ti nasao a pagagasan.
Dagiti kagawaan pang medical ket dakkel a tulong para iti pannakapasayaat pay ti serbisyo para iti salun-at ti Benguet province.
Sigun kenni Yap, rumbeng laeng a maipaayan ti naan-anay a suportq dagiti medical services ti probinsya tapno maidanon amin daytoy kadagiti agkasapulan nga umili.
Ti dental chair ket maaramat kas baro a pasilidad ti ospital nangruna ta daan unayen ken saanen a napabaruan dagiti kagawaan iti dental area ti BeGH.
Impaganetnet pay ti opisyal ti kinapateg ti suporta ti gobierno iti sektor ti salun-ar tapno mapalawa ken mapapintas ti pasilidad dagiti ospital nu sadino daytoy ti kangrunaan nga ipaay na kadagiti rural hospitals ti Benguet.
Kinomendaran na pay ti dedikasyon dagiti medical professionals ken staff ti ospital gapu ta isuda ti mangipadpadanon kadagiti napapateg a healthcare services kadagiti residenti ti probinsya.
Maipalagip nga idi tawen 2021 ket pinundoan ni Cong. Yap ti sangapulo a dialysis machines a naikabil iti BeGH.
Impanamnama pay ti Benguet representative ti panangituloy na nga agbirok iti pundo manipud iti national government tapno maipaay iti kanayunan a sweldo ken benepisyo dagiti mangmangged iti pagagasan ken ti naituding a pannakaipatakder ti baro a pasdek tapno ad-adu dagiti maakomodar a pasyente.
Immuna metten a nagipasdek ti bukod da a molecular laboratory, oxygen high flow machines ken dadduma pay a health facilities ti ospital idi kangitingitan ti Covid19 pandemic a nagtaod iti bukod wenno personal resources ni Cong. Yap.// Via Bombo Jordan Tablac
