BAGUIO CITY – Dumanon iti lima a COVID-19 patient ti matamtaming iti Baguio General Hospital and Medical Center (BGHMC) bayat a 12 ti nakarekober manipud iti 18 a bilang dagiti nagpositibo iti nasao a sakit iti siudad ti Baguio nupay maysa ti pimmusay.
Daytoy ket kalpasan a nanayonan iti maysa ti kaso ti Baguio isut gapuna a dumanonen ita iti 18 ti COVID positive cases ti siudad kasaruno ti panagpositibo iti nasao a sakit ti maysa a nars ti BGHMC.
Iti interview ti Bombo Radyo Baguio kenni City Health Officer Dr. Rowena Galpo, kinunana a 152 dagiti suspected cases ken dagitoy ket adda kadagiti ospital iti siudad, iti maysa a hotel nga agserserbi a quarantine facility, kadagiti babbalay dagitoy ken iti quarantine facility para kadagiti OFWs sadiay Teachers’ Camp.
Dinakamatna nga ita ket 18 wenno 14 a taga-Baguio ken 4 a taga-Benguet nga OFWs ti adda iti quarantine facility para kadagitoy sadiay Teachers’ Camp.
Impannakkelna met nga adu ti nakalpas iti quarantine dagitoy ken adu dagiti naimbagan suspected ken probable cases ditoy siudad.
Sigun pay kenkuana, agresibo ti isaysayangkatda a contact tracing babaen iti digital innovation nga inyam-ammo ni Mayor Benjamin Magalong.
