BAGUIO CITY- Inaklon ti Baguio General Hospital and Medical Center (BGHMC) a nalidem a mapaksyat ti kaso ti tuberculosis iti rehiyon Cordillera kagiddan ti pannakaobserbar ti World Tuberculosis Day inton Marso 24 iti agdama a tawen nga addan iti tema a “Invest to end TB, Save Lives”.
Nupay kasta, positibo latta dagitoy nga agbalin a zero tb cases ti rehiyon iti baet nga adda ti nailista ti TB DOTS a 71 cases.
Sigun ken BGHMC TB-DOTS Head Dr. Aleli De Guzman Pamplona, kasapulan ti tulong manipod kadagiti umili ti rehiyon tapno magun-od ti zero tb case.
Kagiddan ti pannakaobserbar ti World Tuberculosis Day, kinunana nga awan paylaeng ti aktibidad a nakalinya para iti daytoy.
Kinunana a matuttutukanda itan ti sakit a tb nangnangruna ta addaan umdas a kapanunutan ita dagiti umili seknan iti nasao a sakit.
Iti datos ti BGHMC TB DOTS, ngimmato ti kaso ti pulmonary tb idi napalabas a tawen a dimmanon iti 2,367 no idilig iti kaso idi 2020 a dimmanon iti 2, 284 bayat a ngimmato metlaeng ti kaso idi napan a tawen iti extrapulmonary tb a dumanon iti 114, nangatngato no idilig iti 108 a kaso idi 2020.
Inlawlawag ni Pamplona a maysa a bacterial disease ti nasao a sakit a masarakan iti tengged a mabalin a maiyakar iti maysa nga indibidual babaen iti panagbaen ken dadduma pay.
Maamuan no nakaptan ti maysa nga indibdiual ti TB no daytoy ket makapaspasar ti panaguyek, panatupra ti dara, panaggurigor, nalaka a mabannog ken pannakakessay ti timbang ken dadduma pay.
Kagiddan iti dayta, nagpalagip ni Dr. Pamplona ti dagos a panagpakunsulta dagiti umili no makapaspasarda ti sintomas ti TB tapno dagos a maagasan daytoy.
