BAGUIO CITY – Nakasayan dagiti illegal peddlers a maiwanwanawan ditoy Baguio City kas maibasar iti obserbasion ti Public Order and Safety Division (POSD).
Iti panakiyuman ti Bombo Radyo Baguio, dinakamat ni POSD Deputy Head Daryl Kim Longid a dumanon iti 5,543 ti bilang dagiti illegal peddlers a natiliw iti opisina dagitoy idi napan a tawen.
Kinunana a nasurok payen iti 17,000 a tonelada a perishable goods ti nakumpiskar manipud kadagiti illegal peddlers.
Innayona a naiwaras dagiti nakumpiskar a taraon iti uppat a centers nga idadauloan ti Department id Social Welfarea nd Development Office ken ti City Social Welfare and Development Office.
Naipaay dagitoy kas tulong kadagiti naabandona nga ubbing ken dagiti biktima ti panagabuso a naka-in-house kadagiti uppat a centers.
Kabayatana, impaganetget ni Longid nga adda latta dagiti ubbing nga aglaklaoi ti nagduduma a taraon ken produkto iti central business district.
Gapu iti daytoy, iyap-apela ti opisyal iti publiko a saanda nga ital-o dagiti ubbing nga aglaklako iti lokalidad gaputa posible nga ar-aramaten laeng dagitoy dagiti sindikato wenno iti managdakdakkes a grupo.
Inaklonna a nalaka a matignay ti rikna ti publiko nangruna no maimatangan dagiti ubbing nga agilaklako iti nagduduma a produkto ngem inyunay-unayna a saan a makatulong ti panaggatang kadagiti lakoda gaputa mapanuynuyan laeng ti aramid dagitoy.
Impanagetgetna pay a saan a patas daytoy kadagiti agab-abang a vendors iti merkado publiko gaputa agbalin a kokompetensiya daytoy.
