BAGUIO CITY- Balligi a naipatungpal ti higlight ti Panagbenga Festival a Grand Floral Float Parade a record-breaking ti bilang dagiti floral floats a nagparada no sadino manipud iti 42 a naituding a floats a makipaset ket nanayunan daytoy no sadino nagbalin daytoy a 44, mas ad-ado nu idilig iti 33 a nakiparada idi napalabas a tawen.
Iti nasao a parada, dagiti nakipaset a floral floats ket buklen iti tallo a kategorya, ti small floral float, ti medium floral float ken ti large floral float.
Iti small floral float, daytoy ket buklen ti 11 a competing entries ken dua a non-competing entries.
Iti medium floral float category, daytoy ket pinasetan ti sangapulo a competing entries bayat nga iti Large Floral float category ket nakipasetan daytoy ti 14 a competing entries ken tallo a non-competing entries.
Indauloan met ti float ti lokal a gobyerno ti siudad ti nasao a parada; sinnaruno dagiti dua a non-competing floats ti Hall of Famer Baguio Country Club; ken ti SM Prime Holdings Inc.
Kabayatana, nakipaset ti El Tribu D. Lucban ken ti Saint Luis University iti parada gapu ta dagitoy ti nangabak iti naipatungpal a drum and lyre competition ken Festival Dance Category idi kalman.
Naipakita met kadagiti floats a dagiti naaramat a sabong floats ket dagiti red roses, bluebonnets, yellow hibiscus, california poppy, bunchberry, Asian flowers ken dadduma pay.
