BAGUIO CITY – Dumanonen iti 20 ti bilang dagiti pimmusay gapu iti dengue fever ditoy rehiyon Cordillera ita a tawen.
Sigun kenni Karen Lonogan, senior health program officer ti Department of Health – Cordillera, iti agdama ket 7,215 ti kaso ti dengue fever iti rehiyon a nailista dagitoy.
Kinunana a nangatngato ti nasao a bilang iti 15% no idilig iti kapada a panawen idi napalabas a tawen.
Linawlawaganna met a tallo kadagiti 20 a pimmusay ket nagtaud iti sabali a rehiyon nga inmay laeng nagpataming ditoy Cordillera.
Binigbig met ti DOH-Cordillera dagiti estudyante kas kangrunaan a makapkaptan ti dengue fever gapu iti kaaddada iti ruar ti pagtaenganda.
Nailista ti kaaduan a kaso ti dengue fever sadiay Benguet.
Sigun pay kenni Lonogan, agtultuloy ti nainget a koordinasyonda kadagiti lokal a gobyerno iti probinsia ken munisipyo malaksid pay kadagiti dadduma nga ahensia iti panakaisayangkat ti search and destroy operations kadagiti lamok kadagiti komunidad.
Agtultuloy metlaeng ti information education campaign ti ahensia seknan kadagiti addang tapnu makaliklika iti dengue fever.
