BAGUIO CITY – Umad-adu dagiti public utility vehicle (PUV) drivers ditoy lokalidad ti agnumnumar iti Service Contracting Program ti gobyerno babaen iti LTFRB.
Kasaruno daytoy ti panagpirma dagiti 37 a drivers ti Beckel Transport Cooperative iti Service Contracting Agreement iti LTFRB nga imbagi ni LTFRB-Cordillera OIC Regional Director Engr. Lalaine Sobremonte.
Naamuan nga agbibiahe dagiti nasao a drivers iti ruta a Baguio-Plaza Beckel, Baguio Plaza-Obulan, Baguio Plaza-Lamut ken Baguio Plaza-Balucas, Shilan.
Maibasar iti datus ti LTFRB-Cordillera, dumanonen iti 127 a PUV drivers ti nakarehistro para iti on-boarding ti Service Contracting System bayat a 366 a PUV drivers iti Cordillera ti nagpirman iti Service Contracting Agreement iti sidong ti Service Contracting Program ti LTFRB.
Naamuan a makipaspaset met iti regular a Service Contracting Orientation ti LTFRB ti ad-adu pay a PUV drivers manipud kadagiti kooperatiba wenno korporasyon a nangpilan ti consolidation iti sidong ti PUV Modernization Program ti gobyerno.
