BAGUIO CITY – Umad-ado ita ti bilang dagiti rebelde a New People’s Army (NPA) ken supporters dagitoy a sumuksuko ken agsubsubli iti sidong ti gobyerno sadiay probinsia ti Ifugao.
Sigun kenni Lt. Col. Narciso Nabulneg Jr., commander ti 54th Infantry Batallion ti Philippine Army, dumanonen iti 100 a rebelde ken supporters ti rebelde a grupo manipod Ifugao ken paset ti Nueva Viscaya ti nagdesisyon a sumuko ken agsubli iti komunidad dagitoy.
Impannakelna a napintas ti resulta ti makatawen a kampanyada kontra iti panagrebelde wenno insurhensia kadagiti nasao a probinsia.
Kinunana a dakkel ti naitulong dagiti peace and development programs ti gobyerno tapno maguyugoy dagiti rebelde ken supporters ti rebelde a grupo nga agsubli iti komunidad.
Mangnamnama met ti militar a manayonan pay ti bilang dagiti sumuko a rebelde ken supporters ti grupo gapota adda ti nakasaga a programa manipod iti gobyerno para kadagitoy.
