BAGUIO CITY – Mapagam-amkan ita ti mapaspasamak a bird trapping activities idiay Mt. Pulag.
Iti panakiuman ti Bombo Radyo kenni Emerita Albas, Superintendent iti Mt. Pulag National Park, mapaspasamak daytoy iti rabii nu sadino makita dagiti nadalosan a paset iti nasao a kabambantayan ken nakaawatda ti report nga adda ti makitkita-da a senyales iti nasao nga aktibidad.
Sigun kenkuana, makapaliday daytoy nga aramid gapu ta kadawyan a matatrap ket dagiti migratory birds.
Inlawlawagna a dagitoy a klase ti billit ket “monitored globally from the point of origin” nu sadino nakababain nu madamag a ditoy Benguet wenno Cordillera ti nakapukawan dagitoy.
Innayona pay a nakaawatda ti report nga adda ti natnag nga indibidual gapu iti gagarda nga agtiliw ti billit.
Sigun kenni Albas, posible a dagiti natiliw a billit ket mailako wenno agserbi kas taraon.
Apelana a daytoy nga aramid ket panaglabsing iti linteg a Republic Act 9147 wenno Wildlife Resources Conservation and Protection Act.
Malaksid iti dayta, kinuna ni Albas a maib-ibos tunggal tawen dagiti migratory bird nu sadino kasapulan nga isecure daytoy.
“Nakababain met a nu madamag a ditoy Benguet wenno Cordillera ti nakapukawan dagitoy.”
Emerita Albas, Superintendent of Mt. Pulag National Park
Mainaig iti dayta, raemen kuma dagitoy a klase ti billit nga agturturong iti Pilipinas.
Dinakamat ni Albas a dagiti metlaeng lokal a residente ti mangipatpatungpal iti panangtiliw ti billit gapu iti nasao a practice.
