Impakaammo ti Baguio Local Civil Registry a mabalinen nga agrequest dagiti umili iti birth certificate, marriage certificate ken death certificate iti online system ti opisinada nga eric.gov.ph.
Sigun ken ni Local Civil Registry Administrative Assistant John Michael Umali, maaramat ti nasao a website tapno maliklikan ti attidog a pila iti uneg ti opisinada ken tapno mabibiit ken naannayas ti panangiproseso dagiti umili kadagiti dokumento dagitoy.
Inlawlawagna a kasapulan laeng nga agi-attach wenno agi-upload ti requirement a dawdawaten ti website tapno maiproseso ti kasapulanda a dokumento.
Apaman a naiproseso ti request dagitoy, makaawatda iti notification kadagiti email nga insumitirda iti website a mangibagbaga a mabalindan nga i-claim dagiti dokumentoda iti opisina ti Local Civil Registry idiay T. Alonzo Street, Baguio City, abay ti Health Center.
Sigun pay ken ni Umali, nailukat ti nasao a website idi Marso ita a tawen babaen iti tulong ti Management Information and Technology Division.
Ad-adalen pay ita ti Baguio Local Civil Registry a pasayaaten ti nasao n website ken planoda nga i-cater dagiti kliyente nga adda iti ruar iti siudad no sadino ipatulodda dagiti kaskenan a dokumento iti exact address dagitoy.//Bombo Karen Sapirao
