Dumanon iti 20 a paltog a nakarehistro kenni Senator Ronald “Bato” Dela Rosa ti boluntaryo a naisurrender idiay Philippine National Police (PNP) idiay Davao City kalpasan a inbabawi ti nasao nga ahensya ti lisensya ken rehistro dagiti paltog daytoy.
Iti agdama, addan iti kustodiya ti Regional Civil Security Unit 11 dagiti paltog para iti safekeeping.
Sigun iti PNP, ti panangbawi dagitoy iti lisensya dagiti paltog ket maitunos iti Republic Act No. 10591 wenno Comprehensive Firearms and Ammunition Regulation Act, a mangipawil nga aggigem ti paltog ti asinoman nga addaaan iti kaso a kriminal nga addaan pannusa a dua a tawen wenno nasursurok pay.
Iti pakabuklan, agarup 117 a paltog ti nakarehistro iti nagan ni Senator Bato no sadino naibilin a maisuko amin dagitoy iti nasao nga ahensya.
Ti revocation order ket naiparuwar idi Mayo 26 iti agdama a tawen kasaruno ti direktiba ti Department of Justice a maiserbin ti warrant of arrest manipud International Criminal Court (ICC) kontra kenni Senator Bato Dela Rosa seknan iti kaso daytoy a crimes against humanity kas co-perpetrator ni sigud a President Rodrigo Duterte. //bombokaren.c.sapirao
