Sapsapulen pay laeng ti National Bureau of Investigation (NBI) ti maipagarup a “body double” ni dismissed Bamban, Tarlac Mayor Alice Guo a mapapati a nausar tapno maliklikan ti pannakatiliw daytoy.
Immunaan a kinumpikar ni Guo kadagiti opisiales ti National Bureau of Investigation idiay Indonesia a ti nasao a lookalike daytoy, ket maysa kadagiti empleado na.
Mainaig iti dayta, impaganetget ti nasao nga ahensia a saanda patien ti kinuna ni Guo nga awan ti timmulong kenkuana a Pilipino a makalibas iti pagilian a Pilipinas.
Kasaruno daytoy iti kinaadu dagiti indibidual a timmulong ken nambalakad kekuana kalpasan a naduktalan ti napakairamanna iti isyu ti Philippine Offshore Gaming Operators.
Kabayatanna, pinaglibakan ni Guo a saanna nga am-ammo ni Atty. Elmer Galicia ti abogado a nangnotaryo iti counter-affidavit daytoy iti kaudain a hearing iti senado.
Nupay kasta, maipalagip nga immuna nga inaklon ni Guo nga am-ammona ti nasao nga abogado kadagiti otoridad ti National Bureau of Investigation (NBI) bayat nga adda dagitoy sadiay Indonesia, nu sadino posible a maysa daytoy a mausar para iti panakaipila ti kaso kontra kenni Atty. Galicia.
